நோர்வூட் பிரதேச சபையில் கடும் பதற்றம்.

நோர்வூட் பிரதேச சபையின் மாதாந்தக் கூட்டத்தில் செவ்வாய்க்கிழமை (21) அன்று ஏற்பட்ட தன்னிச்சையான செயற்பாடுகள் காரணமாக கடும் பதற்ற நிலை உருவாகியுள்ளது. தேசிய மக்கள் சக்தி (NPP) கட்சியைச் சேர்ந்த தவிசாளர்   பிரான்சிஸ்  எலனின் நடவடிக்கைகளுக்கு எதிர்ப்புத் தெரிவித்து, ஆளும் மற்றும் எதிர்க்கட்சி உறுப்பினர்கள் கூட்டத்தைப் புறக்கணித்து வெளிநடப்புச் செய்தனர். இதனால் சபை 10 நிமிடங்களுக்கு ஒத்திவைக்கப்பட்டது.

நெருக்கடிக்கான காரணங்கள்:

• மூன்று எதிர்க்கட்சி உறுப்பினர்களின் ஆலோசனைகளை மட்டுமே ஏற்று தவிசாளர் செயற்படுவதாகக் குற்றஞ்சாட்டப்பட்டுள்ளது.
• தவிசாளருக்கு அவரது கடமைகள் குறித்த முறையான புரிதல் இல்லை எனவும், இதனாலேயே சபை இந்த நெருக்கடியைச் சந்தித்துள்ளதாகவும் இலங்கை தொழிலாளர் காங்கிரஸ் (CWC) மற்றும் தேசிய மக்கள் சக்தி உறுப்பினர்கள் சுட்டிக்காட்டினர்.

ஊடகங்களுக்குத் தடை மற்றும் தவிசாளரின் விளக்கம்:

• சபைக்குள் செய்தி சேகரிக்கச் சென்ற ஊடகவியலாளர்களுக்குத் தவிசாளர் அனுமதி மறுத்தார்.
• மாறாக, தனக்கு நெருக்கமான, ஊடகவியலாளர்கள் அல்லாத இருவருக்கு மட்டுமே செய்தி சேகரிக்க அனுமதி வழங்கப்பட்டமைக்கு உறுப்பினர்கள் கடும் எதிர்ப்புத் தெரிவித்தனர்.
• இது குறித்துத் கருத்துத் தெரிவித்த தவிசாளர், சபையின் முரண்பாடுகளை மட்டுமே ஊடகங்கள் காட்டுவதாகவும், தனது கருத்துக்களுக்கு முக்கியத்துவம் அளிப்பதில்லை எனவும் குற்றஞ்சாட்டினார்; இதனாலேயே தான் ஊடகங்களுக்குத் தடை விதித்ததாகவும் அவர் குறிப்பிட்டார்.