ட்ரம்பை விலைக்கு வாங்க திட்டமிடும் புடின்!

ரஷ்ய ஜனாதிபதி விளாடிமிர் புடின், அமெரிக்க ஜனாதிபதி டொனால்டு ட்ரம்ப் மீது தாக்கத்தை ஏற்படுத்தும் வகையில் 12 டிரில்லியன் டொலர் மதிப்பிலான பொருளாதார ஒப்பந்தத்தை முன்வைத்ததாக The Economist பத்திரிகை தகவல் வெளியிட்டுள்ளது. அறிக்கையின் படி, உக்ரைன் போருக்கு முடிவு காணும் பேச்சுவார்த்தைகளுடன் இணைத்து, ரஷ்யா-அமெரிக்கா இடையே “மிகப்பெரிய பொருளாதார கூட்டணி” உருவாக்கும் திட்டம் முன்வைக்கப்பட்டது.

இதில், ட்ரம்ப் அணியுடன் தொடர்புடையவர்களுக்கு ரஷ்யாவின் முக்கிய திட்டங்களில் பங்குகளை வழங்கும் யோசனையும் இடம்பெற்றது.

குறிப்பாக, ஆர்க்டிக் எண்ணெய் மற்றும் எரிவாயு அகழ்வு, அரிய கனிமங்கள் சுரங்கம், அணு சக்தி கொண்டு இயங்கும் தரவு செயலாக்க மையம், பேரிங் நீரிணையில் சுரங்கப்பாதை போன்ற திட்டங்கள் விவாதிக்கப்பட்டதாக கூறப்படுகிறது.

கடந்த ஆகஸ்டில் அலாஸ்காவில் புடின்-ட்ரம்ப் சந்திப்பு நடைபெறுவதற்கு முன், ரஷ்ய பாதுகாப்பு கவுன்சிலுக்காக தயாரிக்கப்பட்ட ஒரு ஆவணத்தில், “இது இரு நாடுகளுக்கிடையேயான மிகப்பெரிய ஒப்பந்தமாக இருக்கும்” என்று குறிப்பிடப்பட்டிருந்தது.

மேலும், “இரு தலைவர்களும் நோபல் பரிசு பெறக்கூடும்” என்ற கூற்றும் அதில் இடம்பெற்றிருந்தது.

இந்த தகவல்கள், ரஷ்யா-அமெரிக்க உறவுகள் மற்றும் உக்ரைன் போரின் எதிர்காலம் குறித்து புதிய கேள்விகளை எழுப்புகின்றன.

புடின் முன்வைத்ததாகக் கூறப்படும் இந்த ‘12 டிரில்லியன் டொலர் சலுகை’ உலக அரசியல் மற்றும் பொருளாதாரத்தில் பெரும் விவாதத்தை தூண்டியுள்ளது.