திடீர் அதிமுக சப்போர்ட்.

தேர்தல் களம் சூடுபிடித்துள்ள நிலையில், சமூக வலைதளங்களிலும் அரசியல் வட்டாரங்களிலும் இப்போது ஹாட் டாப்பிக் விசிக தலைவர் திருமாவளவன் தான். கடந்த இரண்டு வாரங்களில் அவர் எடுத்து வரும் முடிவுகளும், உதிர்க்கும் கருத்துகளும் ரத்தத்தின் ரத்தங்களையும், உடன்பிறப்புகளையும் ஒரே நேரத்தில் குழப்பத்தில் ஆழ்த்தியுள்ளது. "அண்ணன் என்ன சொல்ல வர்றாரு?" - இதுதான் இப்போதைய மில்லியன்பாலர் கேள்வி. பகுஜன் சமாஜ் கட்சியின் மாநிலத் தலைவராக இருந்த ஆம்ஸ்ட்ராங் மறைவுக்குப் பிறகு, அவரது மனைவி பொற்கொடி அதிமுக வேட்பாளராகக் களம் இறங்கியுள்ளார். கூட்டணி தர்மத்தின்படி பார்த்தால் இது திமுக முகாமுக்கு சங்கடம்தான்.

ஆனால், திருமாவளவனோ எதையும் யோசிக்காமல் அவருக்கு வாழ்த்து மழை பொழிந்தார். இத்தனைக்கு ஆம்ஸ்ட்ராங் கொலை வழக்கில் அதிமுக நிர்வாகிகளே கைதானார்கள் என்பது வேறு கதை. நிஜமான பாசமா? ஆம்ஸ்ட்ராங் குடும்பத்துடனான நட்பு ஒருபுறம் இருந்தாலும், ஒரு வேட்பாளராக அவரை வாழ்த்துவது திமுக கூட்டணியின் வெற்றியைப் பாதிக்குமா என்ற கேள்வி எழுந்துள்ளது. எதிர்க்கட்சி பாசம்: அதிமுக வேட்பாளரை விசிக தலைவர் வாழ்த்துவது, தொகுதிக்குள் இருக்கும் தலித் வாக்குகளைச் சிதறடிக்குமோ என்ற அச்சத்தில் இருக்கிறது அறிவாலயம்.

திமுக கூட்டணியில் விசிக-வுக்கு ஒதுக்கப்பட்ட இடங்கள் குறித்து திருமாவளவன் ஏற்கனவே அதிருப்தியை வெளிப்படுத்தியிருந்தார். "எங்களுக்கு இன்னும் கூடுதல் இடங்கள் கிடைத்திருக்க வேண்டும்" என மேடைதோறும் முழங்கியவர், கடைசியில் கிடைத்த தொகுதியில் யாரை நிறுத்தினார் தெரியுமா? ஒரு காங்கிரஸ் பின்னணி கொண்ட வேட்பாளரை! விசிக தொண்டர்கள் மத்தியில் இது பெரிய சலசலப்பை ஏற்படுத்தியுள்ளது. "சொந்தக் கட்சி வேட்பாளர்களை உருவாக்காமல், இறக்குமதி வேட்பாளர்களுக்கு வாய்ப்பு கொடுத்தால் கட்சி எப்படி வளரும்?" என கீழ்மட்ட நிர்வாகிகள் குமுறுகிறார்கள்.

ஜெயிக்க வேண்டும் என்ற எண்ணம் உண்மையிலேயே இருக்கிறதா அல்லது இது வெறும் 'அட்ஜஸ்ட்மெண்ட்' அரசியலா என்ற சந்தேகம் எழுவதைத் தவிர்க்க முடியவில்லை. எல்லாவற்றிற்கும் மேலாக, அண்மையில் அவர் ஆற்றிய ஒரு உரைதான் 'மாஸ்டர் ஸ்ட்ரோக்' அல்லது 'செல்ஃப் கோல்' என்று விவாதிக்கப்படுகிறது. "நான் மட்டும் அதிமுக-வுடன் கூட்டணி வைத்திருந்தால், எடப்பாடி பழனிசாமி பாஜக பக்கம் போயிருக்க மாட்டார். இன்றைய அரசியல் சூழலே மாறியிருக்கும்." இந்த ஒற்றை வரி, திமுக தலைமையை உற்றுப் பார்க்க வைத்துள்ளது.

ஒருவேளை அதிமுக-வுக்குத் தூது விடுகிறாரா அல்லது திமுக-வை மிரட்டுகிறாரா? "பாஜக-வை எதிர்க்கிறேன்" என்று சொல்லிக்கொண்டே, அதிமுக-வுடன் நெருக்கம் காட்டுவது யாருக்கான லாபம்? வெற்றி இலக்கா... அல்லது வெறும் இருப்பை நிலைநாட்டவா? தேர்தலுக்கு இன்னும் சில நாட்களே உள்ள நிலையில், திருமாவளவனின் இந்த 'யூ-டர்ன்' அரசியல் அவரது தொண்டர்களுக்கே புரியாத புதிராக இருக்கிறது. திமுக கூட்டணியில் இருந்துகொண்டு அதிமுக-வை சிலாகிப்பது. அதிமுக வேட்பாளருக்கு வாழ்த்துச் சொல்வது. தனித்துவமான விசிக வேட்பாளரை நிறுத்தாமல் காங்கிரஸ் நபருக்கு வாய்ப்பு தருவது. இவையெல்லாம் பார்க்கும்போது, திருமாவளவன் இந்தத் தேர்தலில் வெற்றியை விட, வருங்கால அரசியல் சதுரங்கத்திற்கான காய்களை நகர்த்துகிறாரோ என்று தோன்றுகிறது. ஆனால், இந்தக் குழப்பமான நகர்வுகள் வாக்காளர்கள் மத்தியில் எடுபடுமா? அல்லது 'இரண்டு படகில் பயணம்' விபத்தில் முடியுமா?