வெனிசுவேலாவுடனான தனது எல்லையில் துருப்புக்களை நிலைநிறுத்துவதாக பிரேஸில் அறிவிப்பு!

கயானாவின் எண்ணெய் வளம் நிறைந்த பகுதியை தங்கள் எல்லைக்குள் இணைக்கும் திட்டத்தை வெனிசுவேலா அறிவித்ததை அடுத்து, வெனிசுவேலாவுடனான தனது எல்லையில் துருப்புக்களை நிலைநிறுத்துவதாக பிரேஸில் கூறியுள்ளது.

கயானா பிரித்தானிய காலனியாக இருந்த 19ஆம் நூற்றாண்டிலிருந்து எஸ்சிகிபோ பகுதி சர்ச்சையில் உள்ளது.
சில ஆண்டுகளுக்கு முன்பு கடல் எண்ணெய் மற்றும் எரிவாயு இருப்புக்கள் கண்டுபிடிக்கப்பட்ட பின்னர் வெனிசுவேலா தனது நில உரிமைகோரல்களை புதுப்பித்தது.

வெனிசுவேலாவில் ஞாயிற்றுக்கிழமை வாக்கெடுப்பு நடத்தப்பட்டதில் இருந்து பதற்றம் அதிகரித்து வருகிறது.
95 சதவீதத்துக்கும் அதிகமான வாக்காளர்கள் எஸ்சிகிபோ பகுதிக்கான அரசாங்கத்தின் கூற்றை ஆதரித்ததாக கூறப்படுகிறது.

இதனிடையே, வெனிசுவேலாவின் ஜனாதிபதி நிக்கோலஸ் மதுரோ, அந்த பகுதியை வெனிசுவேலாவின் ஒரு பகுதியாக மாற்றுவதற்கான சட்டமூலத்தை தேசிய சட்டமன்றம் நிறைவேற்ற முன்மொழிந்துள்ளார். அத்துடன், மாநில எண்ணெய் நிறுவனத்துக்கு அங்கு எண்ணெய்யை பிரித்தெடுக்கும் உரிமங்களை வழங்குமாறு கேட்டுக் கொண்டார்.

இந்த நடவடிக்கை அப்பகுதி முழுவதும் கவலையை ஏற்படுத்தியுள்ளது. கயானா தனது துருப்புக்களை அதிக எச்சரிக்கையுடன் வைத்திருக்கும் அதே வேளையில், பிரேஸில் இராணுவம் ரோரைமா மாநிலத்தின் தலைநகரான போவா விஸ்டாவின் எல்லை நகருக்கு அதிக வீரர்களை நகர்த்துவதாகவும், மேலும் ஆயுதம் ஏந்திய வாகனங்களை கொண்டு வருவதாகவும் கூறியுள்ளது.

எவ்வாறாயினும், வெனிசுவேலாவின் எந்தவொரு இராணுவ ஊடுருவலும் தளவாட ரீதியாக சவாலானதாக இருக்கும், வெனிசுவேலா வீரர்கள் மற்ற இடங்களில் சவாலான நிலப்பரப்பு காரணமாக எஸ்சிகிபோவிற்குள் நுழைந்தால் பிரேஸிலிய பகுதி வழியாக செல்ல வேண்டும் என்பது குறிப்பிடத்தக்கது.