இலங்கை ஏற்றுமதிகளுக்கு 20%!

70 க்கும் மேற்பட்ட நாடுகள் மீது 10% முதல் 41% வரை பரஸ்பர வரிகளை விதிக்கும் நிர்வாக உத்தரவில் அமெரிக்க ஜனாதிபதி டொனால்ட் ட்ரம்ப் வியாழக்கிழமை (ஜூலை 31) கையெழுத்திட்டார்.

அதன்படி, ட்ரம்ப் நிர்வாக உத்தரவின் மூலம் அறிவித்த திருத்தப்பட்ட விகிதங்களில் இலங்கைக்கு 20 சதவீத வரி விதிக்கப்பட்டுள்ளது.

இது நிர்வாக உத்தரவு 14257 இன் கீழ் முன்னர் விதிக்கப்பட்ட 30 சதவீத வரியிலிருந்து குறைவாகும்.

இலங்கை ஏற்றுமதிகளுக்கு ஏப்ரல் மாதத்தில் ட்ரம்ப் ஆரம்பத்தில் 44% வரி விகிதத்தை அறிவித்திருந்தார்.

எனினும், ஜூலை 10 அன்று ஜனாதிபதி அநுரகுமார திசாநாயக்கவுக்கு அனுப்பப்பட்ட கடிதத்தின்படி, இந்த விகிதம் பின்னர் 30% ஆகக் குறைக்கப்பட்டது.

இந்த நிலையில் அமெரிக்க வர்த்தக அதிகாரிகளுடன் பல மாதங்களாக நடைபெற்ற பேச்சுவார்த்தைகளுக்குப் பின்னர் ஜூலை 31 அன்று வெளியிடப்பட்ட ஜனாதிபதி ட்ரம்பின் உத்தரவின் மூலம் இலங்கைக்கான வரி விதிப்பு குறைக்கப்பட்டுள்ளது.

இலங்கை எதிர்கொள்ளும் வரி விகிதம் பங்களாதேஷ், வியட்நாம், மலேசியா (19), இந்தோனேசியா (19), தாய்லாந்து (19), பாகிஸ்தான் (19) ஆகிய நாடுகளுக்குச் சமமாகவே அல்லது ஒத்ததாகவே உள்ளது.

மேலும், இந்தியாவின் 25 சதவீத வரியை விட குறைவாகும்.

ஆப்பிரிக்க நாடுகள் மற்றும் சிறிய தீவு நாடுகளுக்கு 15 சதவீத வரிகளும் வரிக்கப்பட்டுள்ளன.

அதேநேரம், சட்டவிரோத போதைப்பொருள் நெருக்கடிக்கு எதிராக கனடா நடவடிக்கை எடுக்கத் தவறியதற்கு பதிலளிக்கும் விதமாக கனடா மீதான வரியை அமெரிக்கா 25% லிருந்து 35% ஆக உயர்த்தியுள்ளது.

வியாழக்கிழமை வெளியிடப்பட்ட இந்த உத்தரவு, அமெரிக்காவின் தொடர்ச்சியான வர்த்தக பற்றாக்குறைகள் தேசிய பாதுகாப்புக்கு “ஒரு அசாதாரண அச்சுறுத்தலாக” இருப்பதாக அறிவித்த நிர்வாக ஆணை 14257 இன் கீழ் ட்ரம்ப் முன்னர் தேசிய அவசர நிலையை அறிவித்ததை அடிப்படையாகக் கொண்டது.

பரஸ்பர கட்டண விகிதங்கள்

• 41% வரி: சிரியா
• 40% வரி: லாவோஸ், மியன்மார்
• 39% வரி: சுவிட்சர்லாந்து
• 35% வரி: ஈராக், செர்பியா
• 30% வரி: அல்ஜீரியா, பொசுனியா எர்செகோவினா, லிபியா, தென்னாப்பிரிக்கா
• 25% வரி: இந்தியா, புரூணை, கசகஸ்தான், மொல்டோவா, துனிஷியா
• 20% வரி: பங்களாதேஷ், இலங்கை, தாய்வான், வியட்நாம்
• 19% வரி: பாகிஸ்தான், மலேசியா, இந்தோனேஷியா, கம்போடியா, பிலிப்பைன்ஸ், தாய்லாந்து
• 18% வரி: நிக்கராகுவா
• 15% வரி: இஸ்ரேல், ஜப்பான், துருக்கி, நைஜீரியா, கானா மற்றும் பல
• 10% வரி: பிரேஸில், பிரித்தானியா, போக்லாந்து தீவுகள்

ஐரோப்பிய ஒன்றியத்தைப் பொறுத்தவரை, 15% க்கும் அதிகமான அமெரிக்க வரி விகிதங்களைக் கொண்ட பொருட்களுக்கு புதிய வரிகளிலிருந்து விலக்கு அளிக்கப்படுகிறது.

ஒன்றியத்தின் 27 உறுப்பு நாடுகளின் சார்பாக வர்த்தக விதிமுறைகளை பேச்சுவார்த்தைகளை ஐரோப்பிய ஒன்றியம் ட்ரம்ப் நிர்வாகத்துடன் தொடர்ந்தும் முன்னெடுத்து வருகிறது.

புதிய கட்டணங்கள் எப்போது அமலுக்கு வரும்?

அண்மைய நிர்வாக உத்தரவு பரஸ்பர கட்டண விகிதங்களை திருத்துவது மட்டுமல்லாமல், இந்த புதிய கட்டணங்கள் எப்போது செயல்படுத்தப்படும் என்பதற்கான அட்டவணையையும் புதுப்பிக்கிறது என்று வெள்ளை மாளிகையின் தகவலில் தெரிவிக்கப்பட்டுள்ளது.

புதிய வரிகள் விதிக்கப்படுவதற்கு முன்பு, வர்த்தக ஒப்பந்தங்களை இறுதி செய்வதற்கான காலக்கெடு ஆகஸ்ட் 1 ஆம் திகதியாக (இன்று) ட்ரம்ப் ஆரம்பத்தில் நிர்ணயித்திருந்தார்.

தற்போது திருத்தப்பட்ட பரஸ்பர வரிகளை எதிர்கொள்ளும் 70க்கும் மேற்பட்ட நாடுகளுக்கு, புதிய விகிதங்கள் உத்தரவு கையெழுத்தான ஏழு நாட்களுக்குப் பின்னர் நடைமுறைக்கு வரும்.

எனினும், இந்தக் கொள்கையில் சில விலக்குகள் உள்ளன.

ஆகஸ்ட் 7 ஆம் திகதிகளில் கப்பல்களில் ஏற்றப்பட்டு அக்டோபர் 5 ஆம் திகதிக்குள் அமெரிக்காவை அடையும் பொருட்கள் புதிய கட்டணங்களுக்கு உட்பட்டவை அல்ல.

கனடாவிற்கு விதிவிலக்கு அளிக்கப்பட்டுள்ளது.

கனேடிய இறக்குமதிகள் மீதான புதிதாக அறிவிக்கப்பட்ட 35% வரி உத்தரவு வெளியான சில மணிநேரங்களுக்குப் பின்னர், உள்ளூர் நேரப்படி ஆகஸ்ட் 1 ஆம் திகதி அமலுக்கு வரும்.

சீனா வர்த்தக ஒப்பந்தம் இன்னும் நிலுவையில்

சீனாவுடன் வர்த்தக ஒப்பந்தம் செய்வதற்கான சாத்தியக்கூறுகளை அமெரிக்கா கருதினாலும், இந்த ஒப்பந்தம் முழுமையாக முடிக்கப்படவில்லை என்றும், அதற்கு இன்னும் ஜனாதிபதி ட்ரம்பின் ஒப்புதல் தேவை என்றும் அமெரிக்க திறைசேரி செயலாளர் ஸ்காட் பெசென்ட் அண்மையில் கூறினார்.

இந்த வாரம் ஸ்டாக்ஹோமில் சீன அதிகாரிகளுடன் இரண்டு நாட்கள் வர்த்தக விவாதங்களின் போது, அமெரிக்க பேச்சுவார்த்தையாளர்கள் சற்று பின்வாங்கினர் என்று பெசென்ட் CNBCக்கு அளித்த பேட்டியில் தெரிவித்தார்.

ட்ரம்ப் நிர்வாகத்துடன் நீடித்த கட்டண ஒப்பந்தத்தை இறுதி செய்ய சீனா ஆகஸ்ட் 12 ஆம் திகதி வரை காலக்கெடுவை எதிர்கொள்கிறது.

அதிகரித்து வரும் கட்டண மோதல் மற்றும் அரிய மண் கனிம ஏற்றுமதிகள் மீதான கட்டுப்பாடுகளை நிறுத்துவதை நோக்கமாகக் கொண்ட மே மற்றும் ஜூன் மாதங்களில் செய்யப்பட்ட ஆரம்ப ஒப்பந்தங்களைத் தொடர்ந்து இது நிகழ்கிறது.