ETR.FM

புதிய பயங்கரவாத எதிர்ப்புச் சட்டத்தை அரசாங்கம் உடனடியாகக் கைவிட வேண்டும்!

12.10.2026 15:18 2 நிமிட வாசிப்பு
புதிய பயங்கரவாத எதிர்ப்புச் சட்டத்தை அரசாங்கம் உடனடியாகக் கைவிட வேண்டும்!

புதிய பயங்கரவாத எதிர்ப்புச் சட்டத்தை அரசாங்கம் உடனடியாகக் கைவிட வேண்டும் என ஜனநாயக தமிழ்த் தேசியக் கூட்டணியின் தலைவர் சுரேஸ் பிரேமச்சந்திரன் வலியுறுத்தியுள்ளார்.

ஜனநாயக தமிழ்த் தேசியக் கூட்டணியின் மத்திய குழு மற்றும் செயற்குழுக் கூட்டம் இன்று வவுனியாவில் உள்ள தனியார் விருந்தினர் விடுதியில் நடைபெற்றபோது ஊடகங்களுக்குக் கருத்துத் தெரிவிக்கும்போதே அவர் இவ்வாறு தெரிவித்தார்.

மேலும் தெரிவிக்கையில், 'அரசைப் பாதுகாப்பதாகக் கூறிக்கொண்டுவரப்படும் புதிய பயங்கரவாத எதிர்ப்புச் சட்டம், தொழிற்சங்கங்கள், எதிர்க்கட்சிகள் மற்றும் பொதுமக்களின் ஜனநாயகப் போராட்டங்களை முற்றிலுமாக ஒடுக்கும் நோக்கம்கொண்டது.

நாட்டில் ஒரு கட்சி ஆட்சி முறையை கொண்டுவருவதற்கான மறைமுக முயற்சியாகக் கருதப்படும் இச்சட்டத்தை, சர்வதேச சமூகமும் உள்ளூர் தரப்புகளும் ஏற்கனவே நிராகரித்துள்ள நிலையில், அரசு உடனடியாகக் கைவிட வேண்டும்.

மாகாண சபை தேர்தல்கள் உடனடியாக நடத்தப்பட்டு, அவற்றுக்கான உரிய அதிகாரங்கள் முழுமையாக வழங்கப்பட வேண்டும். மேலும், தற்போதைய ஜனாதிபதி தனது தேர்தல் விஞ்ஞாபனத்தில் குறிப்பிட்டுள்ளவாறு, ஜனாதிபதி முறைமை முற்றிலுமாக ஒழிக்கப்பட வேண்டும் என்பது கூட்டணியின் முதன்மைக் கோரிக்கையாக மீண்டும் வலியுறுத்தப்பட்டுள்ளது.

வெடுக்குநாறிமலையில் புத்தர்சிலை வைப்பு, யாழ்ப்பாணத்தில் திலீபன் சிலை மற்றும் செம்மணி புதைகுழிகள் போன்ற பல்வேறு பிரச்சினைகள் மூலம் மக்களின் உண்மையான கோரிக்கைகள் திசைதிருப்பப்படுகின்றன.

வடக்கு-கிழக்கில் தொடரும் நில அபகரிப்புகள், காணாமல் ஆக்கப்பட்டோர் விவகாரம் மற்றும் ஏனைய அடிப்படைக் பிரச்சினைகளுக்கு சர்வதேசப் பொறிமுறையின் ஊடாக உரிய தீர்வு காணப்பட வேண்டும். தற்போதைய ஆட்சியின் இரண்டு வருட காலத்தில் தமிழ் மக்களுக்கு வழங்கப்பட்ட வாக்குறுதிகள் எவையும் நிறைவேற்றப்படவில்லை.

இதனைக் கண்டித்து சாவகச்சேரியில் முன்னெடுக்கப்பட்ட உண்ணாவிரதப் போராட்டத்தைத் தொடர்ந்து, மட்டக்களப்பு உள்ளிட்ட கிழக்கு மாகாணப் பகுதிகள் உட்பட ஏனைய மாவட்டங்களிலும் தொடர்ச்சியான கண்டனப் போராட்டங்களை முன்னெடுக்கத் தீர்மானிக்கப்பட்டுள்ளதாகவும்' தெரிவித்தார்.

     
பகிர்ந்து கொள்ளுங்கள்
Facebook WhatsApp
LIVE ETR நிகழ்வுகள்