கத்ரீனா கைப் - விஜய் சேதுபதி நடிக்கும் பாலிவுட் படம்.... தலைப்பு அறிவிப்பு

ஸ்ரீராம் ராகவன் இயக்கத்தில் விஜய் சேதுபதி, கத்ரீனா கைப் இணைந்து நடிக்கும் பாலிவுட் படத்தின் தலைப்பு அறிவிக்கப்பட்டுள்ளது.

தமிழ், தெலுங்கு, மலையாளம் என பல்வேறு மொழி படங்களில் நடித்துள்ள விஜய் சேதுபதி, அடுத்ததாக பாலிவுட்டில் அறிமுகமாக உள்ளார். அதன்படி சந்தோஷ் சிவன் இயக்கத்தில் உருவாகும் மும்பைகார் படத்தில் அவர் நடித்து வருகிறார். இது தமிழில் லோகேஷ் கனகராஜ் இயக்கத்தில் வெளியாகி வெற்றிபெற்ற மாநகரம் படத்தின் இந்தி ரீமேக்காகும். 

அதேபோல், அந்தாதூன் படத்தை இயக்கி பிரபலமான ஸ்ரீராம் ராகவன், அடுத்ததாக இயக்கும் புதிய இந்தி படத்தில் ஹீரோவாக நடிக்க ஒப்பந்தமாகி உள்ளார் விஜய் சேதுபதி. இதில் விஜய் சேதுபதிக்கு ஜோடியாக பிரபல பாலிவுட் நடிகை கத்ரீனா கைப் நடிக்க உள்ளார்.

இந்நிலையில், இந்த படத்தின் தலைப்பு அறிவிக்கப்பட்டுள்ளது. அதன்படி இப்படத்திற்கு ‘மேரி கிறிஸ்துமஸ்’ என பெயரிடப்பட்டுள்ளது. இது திரில்லர் படமாக உருவாக உள்ளது. இப்படத்தின் படப்பிடிப்பு வருகிற ஏப்ரல் மாதம் புனேவில் தொடங்க உள்ளது.